Sigurimi i Përgjegjësisë së Drejtorëve dhe Oficerëve (D&O) ofron mbrojtje financiare për anëtarët e bordeve drejtuese, administratorët, drejtorët ekzekutivë dhe funksionarët e tjerë të lartë të një shoqërie apo subjekti kundrejt pretendimeve që mund të ngrihen ndaj tyre për veprime, vendime, gabime, neglizhencë, deklarime të pasakta ose shkelje të detyrave menaxheriale gjatë ushtrimit të funksioneve të tyre. Polica mbulon, sipas kushteve të saj, dëmshpërblimet dhe shpenzimet e mbrojtjes ligjore që rrjedhin nga pretendime të aksionarëve, investitorëve, kreditorëve, punonjësve, autoriteteve rregullatore ose palëve të tjera të interesuara.
Ky sigurim është veçanërisht i përshtatshëm për shoqëritë tregtare, institucionet financiare, kompanitë e listuara ose në proces investimi, shoqëritë me aksionarë të shumtë, grupet e kompanive, organizatat jofitimprurëse, si dhe çdo biznes ku drejtuesit përballen me ekspozim të konsiderueshëm ndaj përgjegjësive ligjore dhe vendimmarrjes strategjike.
D&O konsiderohet një element i rëndësishëm i qeverisjes korporative dhe menaxhimit të riskut, duke kontribuar në mbrojtjen e drejtuesve dhe të vetë shoqërisë nga pasojat financiare dhe reputacionale të pretendimeve të lidhura me aktivitetin drejtues.
